skip to content

அதுவும் இதுவும் - சிலேடைகள் (01-10)

அதுவும் இதுவும் - சிலேடைகள் (01-10)

  • கண் - மைப்பேனா (1)

    வெள்ளைக் கருப்பாய் விளையாடும்; மையேற்க,
    கள்ளுண்ட போதைக் களியாட்டம் - உள்ளுறங்கும்
    எண்ணங்கள் ஊற்றாகும்; வற்றச்சொல் வாரா;கூர்
    கண்ணொத்த மைப்பேனா காண்

  • கைக்கடிகாரம் - குதிரை (2)

    ஓடிக்கொண் டேயிருக்கும், ஓடுங்கால் தானொலிக்கும்,
    நாடுங்கால் பின்னகரும், நையவிசை கூடும்,
    கனையக்கை வைதணியும், காருலோ கத்தோற்
    பிணைகடிகை யும்பரியும் நேர்

    கனைதல் - To sound, as a drum; ஒலித்தல்
    நைய - வருத்த / வளைக்க
    கனைத்தல் - குதிரையின் ஒலி
    கார் - கருமை

  • தொலைபேசி - நாய்க்குட்டி (3)

    படுத்தால் சிணுங்கும், பலவா றொலிக்கும்,
    எடுத்தால் அமைதியுமே னென்றுப் - பிடித்தால்
    தலைசாயப் பேசும், சதாவிழிக்கும், வால்சேர்
    தொலைபேசி நாய்க்குட்டி நேர்

  • செய்தித்தாள் - நடிகை (4)

    வண்ணமுகப் பால்நல் விலைதேறும், வந்தநாள்
    கண்மொய்க்கும், அன்பர்தம் கூட்டம்காண் - முன்னாள்
    படிமறையச் சின்னதாய் பாத்திரமாம், செல்லா
    நடிகையும் நாளேடும் நேர்

  • மான் - மயில் (5)

    கண்ணார் கருமேனி, கானகத்தே ஈதழகு,
    விண்ணார் அழகனமை ஊர்தியுமாம் - பெண்காண்
    கவிகட்கோ பின்னுவமை, காற்றாடுந் தோகை,
    கவரியுமாய் மான்மயிலைக் காண்

    அழகனமை - அழகன் அமை(யும்) / அழகன் அ(ம்)மை
    தோகை - மயிற்பீலி / விலங்கின் வால்
    கவரி - கவரி மான் / சாமரம்

  • பல் - தேங்காய் (6)

    பார்வைக்கு வெந்நிறம்; பாலென்றும் பேர்பெறும்;
    நார்துலக்கும்; வீழ்ந்துடைய நேரும்;வாய் நீர்கசியும்;
    பாங்காய் அரைத்துண்ணப் பண்டச் சுவையூறத்
    தேங்காயும் பல்லுங்காண் நேர்

  • திருமணம் - மாலை (7)

    இணையப் பிறக்கு மெதிரெதிராய்த் தொடக்கம்;
    பிணையுமோர் நாணால்; பெறுந்தோள் - அணையுமன்பு
    வற்றமணம் வாடும்; விரலா லிணைந்தொன்றில்
    மற்றொன்றாய் மாலைமணம் காண்

  • கணினி - விளக்குமாறு (8)
    எல்லாம் விளக்குமெலி ஊருமிடம் போய்வரும்;
    செல்லவோர் ஊர்தியாம் சூனியத்தே - சொல்லின்
    பணிந்தீரா லேபெருக்கும்; பின்கழிவைக் கூட்டும்;
    கணினிக்கு நேர்விளக்கு மாறு

    சொற்பிரித்து:-
    எல்லாம் விளக்கும்; எலி ஊரும் இடம் போய்வரும்;
    செல்லவோர் ஊர்தியாம் சூனியத்தே - சொல்லின்
    பணிந்து ஈராலே பெருக்கும்; பின்கழிவைக் கூட்டும்;
    கணினிக்கு நேர்விளக்கு மாறு

  • முடைபாய் - கடன் (9)
    இடைவிடா தோர்இறுக்கம்; ஈந்திலையே என்பர்;
    முடைநேரம் கைமாறும்; மூழ்த்த அடையும்;
    படுக்கும் பணிக்காம்; படுத்தால் உறுத்துங்
    கடனாய் முடைபாயைக் காண்

    ஈந்து - ஈதல் / ஈச்சம்
    முடை - பணமுடை / பாய் முடைதல் (பின்னுதல்)
    மூழ்த்து - மூழ்கச்செய்தல் / மூடு
    படுத்தல் - துயிலுதல் / வியாபாரம் படுத்தல்

  • நாய் - பட்டம் (10)
    வாலிருக்கும், வானமையும், உச்சமே லேறுங்காண்,
    பாலருக்கோர் ஆடுபொருள், பின்நாண்வில் போலிருக்கும்,
    சார்ந்திருக்கும் கையிழுக்கச் சற்றசையும்; நாரறச்
    சோர்ந்தலையும் பட்டம்நாய் நேர்

    வான் - அழகு / ஆகாயம்
    உச்ச - உச்சுக்கொட்டுதல்
    ஏல் - மிக
    நாண் - முதுகுத்தண்டு / தண்டு (மூங்கிற்பட்டை)

01-10 11-20 21-30 31-40 41-50 51-60 61-70 71-80 81-90 91-100
Powered by Drupal. CrystalX theme created by Nuvio | Webdesign.