skip to content

யமகப்பாடல்கள்

யமக பாடல்கள்
(வேறுபட்ட படைப்புகளின் தொகுப்பு)

  1. தீயுமை யேந்தியே...

    படைப்பமைப்பு: கட்டளைக் கலித்துறை (யமக வடிவத்தில்)

    பாடல்:

    தீயுமை யேந்தியே தாண்டவ மாடினன் தோயமுறைத்
    தீயுமை யேந்தியே தான்பரு கிப்பெருந் தேவரைக்காத்
    தீயுமை யேந்தியே தோழனின் காய்பசி தீர்த்தனனே
    தீயுமை யேந்தியைக் கைதொழ யாதொரு தீவினையுமே

    சொற் பிரித்து:

    தீயும் ஐ ஏந்தியே தாண்டவ மாடினன் தோயம் உறைத் (கரத்தில் தீயேந்தியவன்)
    தீயும் ஐ ஏந்தியே தான் பருகிப் பெருந் தேவரைக் காத்து (தீ - விடம்)
    ஈயும் ஐ ஏந்தியே தோழனின் காய்பசி தீர்த்தனனே ( தோழன் - சுந்தரர்; சுந்தரருக்காக பிச்சையெடுத்த திருவிளையாடல்)
    தீயும் உமை ஏந்தியைக் கைதொழ யாதொரு தீவினையுமே (தீயும் - அழியும்)

    பொருள்:

    1. "தீயும் ஐ ஏந்தியே தாண்டவ மாடினன்"
    கரத்தில் தீயை ஏந்தியபடி தாண்டவமாடும் சிவன்
    2. "தோயம் உறைத் தீயும் ஐ ஏந்தியே தாம் பருகிப் பெருந் தேவரைக் காத்து"
    தோயம் - கடல்; தீ - விடம்
    கடலில் திரண்ட விடத்தை கைகளாலேந்தி தானுண்டு தேவர்களைக் காத்தான்.
    3. "ஈயும் ஐ ஏந்தியே தோழனின் காய்பசி தீர்த்தனனே"
    தோழன் - சுந்தரர்;
    சுந்தரருக்காக, மற்றவர்களுக்கு ஈயும் கைகளாற் பிச்சையெடுத்த திருவிளையாடல்,
    4. "உமை ஏந்தியைக் கைதொழ * தீயும் * யாதொரு தீவினையுமே"
    தீயும் - அழியும்
    உமையேந்தியை கைகள் தொழ யாதொரு தீவினையும் அழியும்.

  2. துதிக் கையிலம் பதியோனைத் ...

    படைப்பமைப்பு: கட்டளைக் கலித்துறை (யமக வடிவத்தில்)

    பாடல்:
    துதிக்கை யிலம்பத் தவழ்பா லகனவந் தாதைவளர்ந்
    துதிக்கை யிலம்பர வான்மண் ணளக்கத் திருவனவந்
    துதிக்கை யிலம்பர் திருவருட் தந்தவன் தீமனமே
    துதிக்கை யிலம்பதி யோனை அறுந்தீந் தொடர்வினையே

    பதம் பிரித்து:
    துதிக்கை இலம்பத் தவழ் பாலகன் அவன் தாதை வளர்ந்து
    உதிக்கையில் அம்பர வான் மண் அளக்கத் திருவன் அவன்
    துதிக்கையில் அம்பர் திரு அருள் தந்தவன் தீமனமே
    துதிக் கையிலம் பதியோனை அறும் தீந் தொடர் வினையே

    சொற்பொருள்:
    இலம்ப - தொங்க; தாதை - தந்தை;
    உதிக்கையில் - பெருக்கையில்; அம்பரம்- வெளி;
    திருவன் - திருமால்; அம்பர் - அங்கே;

  3. முதலாய் அகரம்
    படைப்பமைப்பு: கட்டளைக் கலித்துறை (யமக வடிவத்தில்)

    பாடல்:
    முதலா யகரங் கொளத்தொல் வழிவரு முத்தமிழே
    முதலா யகரம் பயின்றே சுவைக்கு முனையின்று
    முதலா யகரந் தொழுதே னிளங்கோ முனிகம்பன்
    முதலா யகரங் களேத்தியத் தோய முதத்தமிழே

    சொல் பிரித்து:
    முதலாய் அகரம் கொளத் தொல்வழி வரு முத்தமிழே
    முதலாய் அகரம் பயின்றே, சுவைக்கும் உனை இன்று முதல்
    ஆய, கரம் தொழுதேன் இளங்கோமுனி கம்பன்
    முதலாய கரங்கள் ஏத்தியத் தோயமுதத் தமிழே

    சொற்பொருள்:
    தொல்வழி - நீண்ட நாள்; ஆய - பரிசீலி; ஏத்திய - தொழுத

    பொருள்:
    அகரத்தை முதலாக கொண்டு தொண்மையான முத்தமிழே,
    இளங்கோ முனிவர் மற்றும் கம்பன் போன்ற கரங்களாய் தொழப்பட்ட, தோயும் அமுதாக விளங்கி, சுவைக்கும் தமிழே, உன்னை, நான் முதலாய் அகரம் பயின்று, இன்று முதல் ஆராய எத்தனித்து கரம் தொழுகின்றேன்.

  4. அஞ்சனம் அஞ்சி யறும்
    அஞ்சுச் சிரத்தோனாம் அஞ்சன் சிரங்குறைத்தோன்
    அஞ்ஞையை தன்னிடம்கொள் அஞ்செழுத்தான் - தஞ்சமாய்
    அஞ்சிதப தம்பணிந்து அஞ்சிப்பின் அஞ்சுவற
    அஞ்சனம் அஞ்சி யறும்

    பொருள்:
    ஐந்து சிரங்கொண்ட பிரம்மனின் (அஞ்சன்) ஒரு தலையை குறைத்து, அன்னையை (அஞ்ஞை) தன் இடப்பக்கம் கொண்ட சிவன் (அஞ்செழுத்தான்) அவனை தஞ்சமடைந்து, அவன் அஞ்சிதபதம் பணிந்து வணங்கிடின் (அஞ்சிப்பின்), நம் பயம் (அஞ்சு) அற, நம் பாவம் (அஞ்சனம்) அஞ்சி அறும்.

  5. பதமாயனையடக்க...
    படைப்பமைப்பு: கட்டளைக் கலித்துறை (யமக வடிவத்தில்)

    பாடல்:
    பதமா யனையடக் கக்கரு கண்டன் பரவியவன்
    பதமா யனையடக் கச்சிற் சபையில் பரதமிடும்
    பதமா யனையடக் கச்செருக் குந்தகு பீடுறப்பசு
    பதமா யனையடக் கும்பே றருளப் பணிவேனே

    பதம் பிரித்து:
    பதமாய் அனை அடக்கக் கரு கண்டன் பரவியவன் (அனை - அன்னை)
    பதம் ஆயனை அடக்கச் சிற்சபையில் பரதமிடும் (ஆயன் - கண்ணன்)
    பதம் மாயனை அடக்கச் செருக்கும் தகு பீடுறப் பசு (மாயன் - மாயையாகிய அசுரன்; தகு-அசுரன்; பீடு-தாழ்வு)
    பத மாயன் ஐ அடக்கும் பேறு அருளப் பணிவேனே (மாயன் - சிவன்; ஐ - ஆசை)

    பொருள்:
    பதமாய் அன்னை பார்வதி கண்டத்தில் விஷத்தை அடக்க அதனால் கருமையான கண்டங்கொண்டவன் சிவன்
    அண்டமெல்லாம் பரவிய சிவனின் பதம் கண்ணனை அடக்கியது
    திருச்சிற்றம்பலத்தில் பரதமாடும் சிவன் பாதத்தில் மாயை என்னும் அசுரனை அடக்கி அந்த அசுரனின் செருக்கை அழித்தான்
    ஆசை அற்ற ஒரு நிலை அடைய, பசுபதி மாயன் அருளப் பணிவோமே

  6. அவந்தாளடியில்...
    படைப்பமைப்பு: கட்டளைக் கலித்துறை (யமக வடிவத்தில்)

    அவந்தா ளடியால் கொளயிருத் தாளுமை அல்லசுரன்
    அவந்தா ளடியால் கொளமீ ளுமாயையோ டாணவமும்
    அவந்தா ளடியாட் களாய்மூ வடியோ னண்டரென
    அவந்தா ளடியாட் கொளவெஞ் சரணம் நமச்சிவாயமே

    பதம் பிரித்து:

    அவன் தாள் அடி ஆல் கொள இருத்தாள் உமை அல் லசுரன்
    அவன் தாளடியால் கொள மீளு மாயையோடு ஆணவமும்
    அவந்தாள் அடியாட்களாய் மூவடியோன் அண்டரென
    அவந்தாளடி ஆட்கொள எஞ் சரணம் நமச்சிவாயமே

    (தாள் - கண்டம்; ஆல் - விடம்; இருத்தாள் - நிறு
    த்தினாள்; அல் - இருள்; அண்டர் - தேவர்)

    பொருள்:

    சிவனின் கண்டத்தில் விடம் கீழிரங்காமல் இருக்க உமையாள் அழுத்தி பிடித்தாள். சிவன், அபஸ்மாரன் என்ற அசுரனை தன் வலது காலால் அழுத்திய படி நடமாடினான். இது மனிதர்களின் மனதில் இருள் போன்ற ஆணவ மாயையை அடக்குவதாக ஐதீகம். சிவனின் காலடியில் அடியாட்களாய்த் திருமாலும் மற்ற தேவர்களும் வணங்கினர். இத்தகைய சிவனின் தாளடிக்கு என் சரணங்கள்.

  7. பலமூறும் மக்கட்சிலர் தற்செருக் கோடம்
    பலமேறி மார்த்தட்டி மாய்ப்பர் - பலமென்றும்
    பக்கிப்பழுத் துப்பின் பழுதாகிப் போம்போலே
    வெட்கப்பின் வீழ்வா ரிவர்.

    (பலம் - வலிமை / பழம்)

  8. தருமருள்கையில் உடுதலையேந் தியரவாற்பெருத் தமரத்
    தருமருள்கையில் தருஆதரு மவன்முடிவிழைந் தரவிந்
    தருமருள்கையில் அடிசேர்த்திரு மால்வழிசயந் தனையே
    தருமருள்கையி லாயனவன் மலரீரடி தயையே

    பொருள்:-
    அருள் தரும் கைகளில் உடுக்கையும் மண்டையோட்டையும் ஏந்தி அரவத்தால் பெருமலையாகிய இமயத்தை மருட்டி, கற்பகத்தருவையும் மற்றும் காமதேனு பசுவையும் தந்தவனுடைய முடியை தொட விழைந்த அரவிந்தன் சிவனின் விஸ்வரூபத்தைக் கண்டு மருண்டு போகையில், தன் அடியை நாடி வந்த திருமாலுக்கு வெற்றியை தந்த, கையிலாய மலையில் நின்றருளும் சிவனின் மலர் போன்ற இருவடிகளே தயை தருக.

  9. ஆண்டுபலப் பொய்யாய்க் கழித்தோம்யாம் பூதம்போல்
    ஆண்டுவரும் செல்வம் எமதாமோ - ஆண்டியாம்
    மாண்டுச் சேருங்கால் தெய்வம் மறந்தோமின்
    தோண்டத் தொடரும் வினை
    (ஆண்டு - வருடம் / பரிபாலித்து / ஆங்கு)
  10. ஓசைபுணைந் தோர்க்காலால் ஆடுமீசன் உம்கையுடுக்
    கோசையெம் நீள்வினை தீதறுக்கும் - உம்மோசை
    ஓமன்றோ பூவசைக்கும்; உள்சுவைக்கும் தீந்தேனென்
    றோமுமை யாம்கைத் தொழுது
    (ஓசை - பாம்பு/சத்தம்/இசை)
  11. தூரமறுத் தென்னுள் துயில்கொண்டு என்னெஞ்சின்
    தூரகழ்ந்து தூய்த்திரு நீராயுனை ஊற்றிச்சிந்
    தூரமரமா யென்சிந் தனைவளர்த்து யாம்நம
    தூரடையாட் கொண்டழிப் பாயென் பிறப்பே
Powered by Drupal. CrystalX theme created by Nuvio | Webdesign.